نوف اعرست يا سعود __>__>_ قصيده تقطع القلب

منذ /18-Mar-2010, 02:47 PM

اخواني اخواتي

الأعزاء

هذه قصيده فيها من المعاناه والحزن مالله به عليم

لأخي وصديقي العزيز الشاعرالمبدع / يوسف العضياني

اعانه الله على ما اصابه

اتمنى ان تنال إعجابكم

يا سعود انا البارح من الشوق غنيت = لعيون غرون عود حالي برنّه
غنيت بالقيفان بيت ورا بيت = واليا انقضى بيتن ختمته بونّه
كني كسير طاح بين النعاتيت = في غارتن سرد السهوم طرحنّه
يمناه مع رجليه راحن فتافيت = والخيل من ضرب قبلاه تركنّه
أوشك عليه الليل لا حي لا ميت = ما غير بعيونه على دربهنّه
وآلا كما عودٍ لحاله تحليت = عمره ورا السبعين قد طافهنّه
عنده عيالٍ طاولو به هل الصيت = خمسة قرومن عاش معهم بجنّه
فيهم من الصطوه شجاعة طواغيت = وفيهم كرم ما يلحقونه بمنّه
بابه مشرع ما لطم قاصد البيت = ومن جاء واله مطلوب ما خاب ظنّه
يلقون ضيف العود بأهلا وحييت= وفيهم من الرحمه لبوهم محنّه
صيته وصل لديار صنعا وتكريت = طيب العيال أرقاه لجبالهنّه
حاله مع عياله ولو قلت خليت = حالة زعيمن دولته مطمئنّه
وفي ساعتن ما تحتمل قول يا ليت= ماتو عياله والليال فجعنّه
راحو بحادث وإختلط دمهم زيت = وأجسامهم صلب الحديد دخلنّه
جاهم وهاله منظرن يلْحِق الميت = وإختل عقله والجنون ركبنّه
يجمع عمايمهم من الأرض والسيت = ويضمهن للصدر ويشمهنّه
يذكر فعول اهل المواجيب والصيت =ويذكر معاورهم وحيله وسنّه
ويجهش بصوتٍ فتت الكبد تفتيت = صوتٍ من أقصى الجاش حزنه يدنّه
ما له ورا الونات غير التناهيت = يطفي لهيب الجوف بإلحاقهنّه
حالي كما حاله ليا أقبلت وأقفيت=مما سمعته كيف صدري يكنّه
مماسمعته فار دمي وفزيت = فزة قريص انياب دابٍ كلنّه
دابٍ عطاه السم من بعد تثبيت = لين الظلوع العوج وصل بهنّه
اوحيت لي علمٍ وياليت ما اوحيت =لا عادت الأيام وجروحهنّه
ماظنتي تبرا بمره و حلتيت = ولا اظن حتى الطب بي فيدهنّه
يا وقت في جرح الضماير تماديت = جددتهن يا وقت وادميتهنّه
لقيت في الأيام ميله وصديت = لا جيت بفتح باب عز قفلنّه
هزيت بيبان السعاده وطقيت = لين افترت يمناي من طقهنّه
وناديت يالأقدار ناديت ناديت= اما اسعدن للحي والا اقتلنّه
اما حياه اقول فيها تهنيت = ولا تروح الروح واقول سنّه
في ما مضى يا سعود في الصدر كنيت = حبٍ بقلبي والظلوع كتمنّه
ليش اقتل الإحساس ما دام حبيت= وليش اجحد الأحداث ما اعدهنّه
يا ما على رجم المحبين عديت = وبينت فيه اسرار واخفيتهنّه
اخفيتهن عن كل مخلوق ما ابديت = وسندتهن للنود واظهرتهنّه
من دون لايدري بشر ويش قاسيت =مواجعن يا اخوك ما احصيتهنّه
هذا بلاي الي عن الناس خفّيت = صابر عليه سنين قلبي يعنّه
والا ورى حالي كما عود كبريت = واخلاقي الشرسه وشيبٍ دعنّه
واليوم راح الي عشقت وتمنيت = الي ظلوعي بالغرام احتونّه
أمس اعرست ياسعود في قصر مرليت = والحلم ظاع وخاب ظنن نظنّه
مماحصل يوم امس لوعه تكوّيت = بأصياخ نارن في الخفوق وسمنّه
ونيت منهن غصب لا طوع واغشيت =وشلون بصبر والخفوق انجظنّه
حاولت اكابر وانتهظت وتعزويت = لكن حزن اعضاي قد شلهنّه
عزيتهن في الحال وشفاي عضيت = وفي موقف التشجيع حطمتهنّه
ومن جرب الي صار ماقال زليت =يدرك مدى الصدمات وآثارهنّه
يعذر ليا مني من الشوق غنيت =ويقول ماقصرت في وصفهنّه
وفي الأبله الزراي مايوم لديت = ولا طوّل الأشناب تفتيلهنّه
نوف اعرست يا سعود وش عاد بقيت = مير اتصل في زوجها اليوم هنّه
ويا سعود كانني بعدها توفيت = هذا القدر يا سعود والموت سنّه

الشاعر
يوسف العضياني

منذ /18-Mar-2010, 03:30 PM

الله الله
قصيده جزله من شاعر جزل
وابيات رائعه كل بيت احلى من الثاني
تسلم يمينك على النقل وصح السان شاعرها

منذ /18-Mar-2010, 03:35 PM

جدا روووووووووووووووووووعه

منذ /23-Mar-2010, 03:16 PM

اسعدني مروركم ....

منذ /23-Mar-2010, 04:33 PM

تقطع القلب بس إبــدآآآآآآع .بمعنى الكـلمه

عوآآآآآآآآآآآفي على هذا الطرح الرآئـع .
الف شكر لك .

أدوات الموضوع
مشاهدة صفحة طباعة الموضوع أرسل هذا الموضوع إلى صديق
طريقة عرض الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر رد
تقطع القلب	ضنـ الشوق ـاني	عذب الكلام	4	12-Jan-2010 12:19 PM
أم تقطع لقلب‎	ولـ الاسكان ـدالخرج	الصوتيات و المرئيات الإسلامية	2	20-Dec-2009 12:24 PM
من القلب الى القلب ..... كيف نتعامل مع بعضنا بالمنتدى	مجنونكـ	المواضيع العامة	4	14-Nov-2009 02:48 AM
تجول في جامعة الملك سعود	System Unit	المواضيع العامة	4	06-Dec-2007 12:43 PM
القمة لأهل القمة ( البرازيـ3ـل / الأرجنتـ0ـين )	لـ صـمـت مــلاك	الرياضة العالمية	13	23-Jul-2007 01:02 PM

الذين يشاهدون محتوى الموضوع الآن : 1 ( الأعضاء 0 والزوار 1)